Tá fáilte curtha ag Boird Oideachais agus Oiliúna na hÉireann roimh scaoileadh suirbhé náisiúnta chuig tuismitheoirí leanaí idir 0-12 bliana d'aois ag an Roinn Oideachais agus Óige. atá le fáil anseo , tá sé mar aidhm aige measúnú a dhéanamh ar an dúil i measc tuismitheoirí i leith oideachais il-chreidmhigh, chomhoideachais agus trí mheán na Gaeilge.
Tá Boird Oideachais agus Oiliúna, pátrúin na Scoileanna Náisiúnta Pobail agus na gColáistí Pobail ar fud na tíre, ar scoileanna bunscoile agus iar-bhunscoile iad atá maoinithe ag an stát, comhoideachais agus il-chreidmheacha, agus an soláthraí oideachais trí mheán na Gaeilge is mó, ag iarraidh ar thuismitheoirí uile leanaí laistigh den chohórt seo, chomh maith le foireann na scoile agus boird bhainistíochta páirt a ghlacadh sa suirbhé agus a gcuid tuairimí a nochtadh.
Ag trácht inniu, Paddy Lavelle, Ard-Rúnaí Bhord Oideachais agus Oiliúna Éireann ( BOOÉ ), comhlacht ionadaíoch náisiúnta na hÉireann BOOanna , dúirt: “Is deis thábhachtach í seo chun eolas a chur ar fáil don tírdhreach oideachais ar fud na hÉireann amach anseo. Is deis í a chinntiú go léiríonn ár scoileanna, amach anseo, an tsochaí éagsúil ina mairimid anois. Mholfaimis do thuismitheoirí, d’fhoireann scoile, agus do bhoird bhainistíochta am a thógáil chun an suirbhé a chomhlánú, agus rochtain a fháil ar na hacmhainní agus an fhaisnéis a chuireann an Roinn ar fáil.”
“Cé go mbíonn daoine cúramach faoi athrú go nádúrtha”, ar lean sé, “tá sé tábhachtach a thabhairt faoi deara, nuair a athraíonn scoil chun bheith, mar shampla, ina Scoil Náisiúnta Pobail faoi phátrúnacht na comhairle áitiúla BOO , tá go leor de na rudaí iontacha atá i bhfeidhm cheana féin fós mar a chéile. Tá an curaclam, an fhoireann, agus na gníomhaíochtaí seach-churaclaim go léir mar a bhí siad. Is é an rud is mó a athraíonn ná go n-áirítear gach leanbh agus a dteaghlaigh go cothrom i rith an lae scoile in éiteas Scoil Náisiúnta Pobail, seachas tús áite a thabhairt d’aon chreideamh amháin.”
"In ionad ranganna reiligiúin Chaitliceacha amháin a dhéanamh, mar shampla, foghlaimíonn páistí faoi dhearcadh domhanda reiligiúnach agus neamhreiligiúnach éagsúil, agus faoi reiligiúin agus creidimh a gcomhscoláirí. I gcás teaghlaigh atá Caitliceach, tá an rogha ann fós do pháistí a gCéad Chomaoineach Naofa nó a nDeimhniú a dhéanamh - is é an t-aon difríocht ná go ndéantar ullmhúchán do na sacraimintí lasmuigh den ghnáthlá scoile."
Léiríonn sonraí ar Chreidimh Reiligiúnacha “gá soiléir le roghanna scoile níos éagsúla”
Léiríonn figiúirí a bhailigh BOOÉ nach bhfuil ach 156 de na 3089 bunscoil ar fud na tíre il-chreidmheach (i.e. 5% de na scoileanna uile) faoi láthair. Tá formhór mór na scoileanna – 95% – faoi phátrúnacht comhlachtaí reiligiúnacha, go príomha an Eaglais Chaitliceach. Léiríonn sonraí ón Daonáireamh is déanaí neamhréir idir creidimh reiligiúnacha mhuintir na hÉireann agus na roghanna oideachais atá ar fáil faoi láthair. I nDaonáireamh 2022, dúirt 31% de dhaoine in Éirinn nach n-aithníonn siad mar Chaitlicigh, agus os cionn 14% ag aithin mar neamh-reiligiúnach agus méaduithe suntasacha ar chreidimh reiligiúnacha eile.
Ag trácht ar na sonraí, dúirt an Dr Séamus Conboy, Stiúrthóir Scoileanna le BOOÉ , atá freagrach as forbairt mhúnla na Scoile Náisiúnta Pobail ar fud na tíre: “Léiríonn sonraí an Daonáirimh go bhfuil gá soiléir le roghanna bunscoile níos éagsúla do theaghlaigh ar fud na tíre. Níl freastal leordhóthanach á dhéanamh ar chuid shuntasach dár ndaonra ag an gcóras oideachais bhunscoile reatha, áit a bhfuil an chuid is mó de na scoileanna á reáchtáil ag an Eaglais Chaitliceach agus a chuireann éiteas Caitliceach chun cinn.”
"Inár dtaighde féin, rinneamar measúnú ar an dúil atá ann i scoileanna ilchreidmheacha ar fud na tíre. Léiríonn ár dtorthaí gur fearr le 61% de dhaoine ar fud na tíre comhlacht ilchreidmheach a bheith acu a sholáthraíonn oideachas seachas comhlacht reiligiúnach. Is fiú a thabhairt faoi deara, fiú i measc daoine a shainaithníonn mar Chaitlicigh, go bhfuil rogha ann d'oideachas ilchreidmheach. Fágann na torthaí seo beagán amhrais nach mór don staid reatha athrú."
Tá tuilleadh eolais faoin Suirbhé Scoileanna 2030 atá á reáchtáil ag an Roinn Oideachais faoi láthair ar fáil ag https://www.gov.ie/en/department-of-education/campaigns/primary-school-survey/
